თბილისში, ბუდაპეშტის ქუჩაზე საცხოვრებელ სახლს ცეცხლი გაუჩნდა. ადგილზე მისულმა სამაშველო ბრიგადამ სახლში 70 წლამდე მამაკაცის გვამი აღმოაჩინა.
მეზობლების თქმით, კაცი დანით მუცლის და სახის არეში დაჭრეს, შემდეგ ბინას ცეცხლი წაუკიდეს.
საგანგებო სიტუაციების მართვის სააგენტოს ცნობით, 112-ში შეტყობინება დაკვამლიანების თაობაზე შევიდა.
მათივე ინფორმაციით, ორი სახანძრო-სამაშველო ბრიგადა ადგილზე დროულად მივიდა.
„სახანძრო-სამაშველო ბრიგადა გამოძახების ადგილზე დროულად მივიდა. ხანძარი მაშველებს 8 კვ.მ-ზე დახვდათ. ცეცხლის ლოკალიზება მალევე მოხდა, რის შემდეგაც სამაშველო ბრიგადამ ბინაში 70 წელს გადაცილებული მამაკაცის ცხედარი აღმოაჩინა“,- განაცხადეს საგანგებო სიტუაციების მართვის სააგენტოში.
ხანძრის გამომწვევი ოფიციალური მიზეზი ჯერ უცნობია.
როგორც “პრაიმტაიმს” შსს-ში განუცხადეს, ფაქტთან დაკავშირებით საგამოძიებო მოქმედებები მიმდინარეობს. სხვა დეტალები ჯერ უცნობია.
